Ginklaro sang Malacañang nga indi sini pag-ipadala sa International Criminal Court (ICC) ang findings sang quad committee hearings kaangot sa extrajudicial killings sa kontrobersyal nga war on drugs ni anay Presidente Rodrigo Duterte.
Ginpaguwa ni Executive Secretary Lucas Bersamin ini nga statement matapos ang panawagan sang mga abogado kaangay kay former Bayan Muna Rep. Neri Colmenares nga isumite ang ang sworn affidavit sang pila ka resource persons sa korte nga amo ang nagbukas sang inquiry sa drug war.
Partikular nga gintumod ni Colmenares ang mga ginpangbuyagyag ni retired police colonel Royina Garma kag self-confessed drug lord nga si Kerwin Espinosa.
Suno naman kay Bersamin, indi na magbalik ang Pilipinas sa ICC. Ginpahayag man sini nga indi na pag-islan ni President Ferdinand Marcos, Jr. ang iya pinsar kag panindugan.
“The Philippines will not return to ICC. Based on this, the President is not expected to change his mind and now refer the quad comm matter to the ICC,” suno sa executive secretary.
Sang Abril, matandaan nga ginsiling ni Marcos nga indi pag-itugyan sang gobyerno si Duterte sa ICC pananglitan may warrant of arrest gid man nga idagdag nga naangot sa drug war.
Ginsiling anay sang presidente nga ang ICC ang may hurisdiksyon lamang sa mga pungsod nga wala nagagana ang judicial system kag wala man naga-function ang pulis.
2019 sang nagbiya ang Pilipinas sa amo nga korte sa The Hague matapos naglunsar ang amo nga international court sang preliminary investigation sa linibo nga nagkalamatay sa drug war ni Duterte.
Nahibaluan man nga samtang nagadugay, labi nga nagadaku ang mga rebeleasyon sa quad comm ukon ang grupo sang apat ka committee sa Kamara nga amo ang nagabusisi sa drug war kag sa Philippine Offshore Gaming Operators (POGOs).
Una na ginsiling sang human rights lawyers nga kun mapasa ang sworn statements nanday Garma kag Espinosa sa international court, mas mapabakod pa sini ang prosecution kay Duterte kag anay Philippine National Police Chief kag subong senador Ronald ‘Bato’ Dela Rosa.
Matandaan nga si Garma nga ginasiling paborito nga pulis ni Duterte kag nakaserbe man anay sa Davao City ang nag-alegar nga may yara sang reward system sa police officers nga involved sa pagpatay sa drug suspects.
Gin-ilog ini suno sa iya sa “Davao model” kun sa diin nagahalin ang padya sa P20,000 tubtub sa P1 million sa kada may mapatay nga drug suspect depende man sa iya klasipikasyon.
Sa statement naman ni Espinosa, ginsiling sini nga si Dela Rosa ang nagmandu sa iya nga itum-ok si anay senador Leila de Lima sa illegal drug trade bilang kabahin sang political demolition.
Abril 2022 sang ginbawi ni Espinosa ang iya mga statement batok kay De Lima kag nagsiling nga lunsay ini sala bangud resulta lamang ini sang pressure, pagpamilit, intimidasyon, kag mga pamahog sa iya kag sa iya pamilya sang amo nga tion.#
