𝗜𝗟𝗢𝗜𝗟𝗢 — Posible nga magapangatubang sang kaso nga rebellion ang sin-o man nga mapamatud-an nga indibidwal nga nagapakigbahin sa rebelde nga grupo gamit ang armas.
Sa interview sang Bombo Radyo kay Alfredo Arungayan III. Bombo Abogado, iya ginpahayag nga sa idalom sang revised penal code, posible lamang maaresto ang isa ka indibidwal bangud sa pag-alsa ukon pagpakig-away batok sa gobyerno kon ini ang nagagamit sang makamamatay nga armas.
Suno kay Arungayan, kon ara ka sa Left-leaning nga organisasyon, apang wala nagabitbit armas, apisar nga nagakontra sa gobyerno, indi ini makabig nga rebellion.
Gin-athag man sini nga ang ginapinahan lamang sang layi amo ang pagbitbit sang armas kag hayag nga nagapamatok sa gobyerno.
Ginpahayag man sang natungdan nga sakop man sang makabig nga ‘rebellion’ ang pagpang-recruit ukon pagpanghagad sa isa ka organisasyon ukon grupo.
Gintumod man ni Arungayan nga nakadependi ang pag-sentensya sa posisyon kag hinimuan sang isa ka myembro sang rebelde nga grupo, kon sa diin, posible man ini magapangatubang sang kaso nga reclusión perpetua.
