Ginapa-imbestigaran na sa National Bureau of Investigation (NBI) sang Securities and Exchange Commission (SEC) Region 6 ang Chiyuto Creative Wealth Document Facilitation Services ukon Chiyuto Double Your Money Scheme.
Ang kompaniya ang ginapamunuan ni Patrocenio Chiyuto ukon mas kilala sa tawag nga Don Chiyuto sa probinsya sang Capiz.
Ini man ang kasunod sang gina-alegar lapnagon nga pagpangtunto sang nasambit nga kompaniya sa diin nagaganyat ini sa mga tawo nga mag-invest sang kwarta nga magadoble sa sulod sang 30 ka-adlaw.
Sa exclusive interview sang Bombo Radyo kay Atty. Russel Ildesa, Director sang SEC Region 6, iya ginpahayag nga sang bulan sang Disyembre, 2020 pa una nga gin-endorso sang ila ahensya ang nasambit nga kompaniya sa NBI.
Suno kay Ildesa, posible nga pasakaan sang kaso kriminal nga large scale estafa ang kompaniya bangud sa mga pagpangtunto.
Ang penalidad sang estafa amo ang masobra 20 ka-tuig nga pagkapreso kag multa nga nagadangat sa P5 million.
Mahimo man nga maulamid suno sa natungdan ang mga kahimbon sang kompaniya kaangay sang upline, investors kag recruiters sa tion nga magpasaka sila sang kaso.
“Kun ikaw ang nag-invest kag bal-an mo nga iligal pala yan..parang one of the scammers kana rin,” pahayag ni Atty. Ildesa.
Dugang pa sang natungdan, madugay na nga gindeklarar nga scam ang Chiyuto Creative Wealth Document Facilitation Services apang kasubong nga mga bulag kag bungol ang mga otoridad sa Roxas City kag probinsya sang Capiz.
