Ginmanduan na sang pamunuan sang Philippine National Police (PNP) ang tanan nga mga regional director kag police chief nga magbulig sa Senado sa pag-aresto kay suspended Bamban, Tarlac Mayor Alice Guo, kag sa pito ka iban pa.
Ini matapos gin-umpisahan na sang Office of the Senate Sergeant at Arms ang pagpangita sa alkalde, kanday Sheila Leal Guo, Wesley Leal Guo, Jian Zhong Guo, Seimen Guo, kag ang iya ginadudahan nga iloy nga si Wen Yi Lin, amo man si Dennis Cunanan kag ang accountant ni Guo nga si Nancy Gamo, kasunod sang pagpagwa sang Senado sang mando nga pag-aresto sa ila.
Nahibaluan nga sa subong, si Gamo lang ang nadakpan sa iya address kag gindala sa Senado sang arresting team sang Sabado.
Suno kay PNP spokesperson Colonel Jean Fajardo, nakaalerto na ang mga hepe sang pulisya sa mga lugar sa diin may address ang mga akusado.
“Dun sa arrest warrants na inissue laban kay Mayor Alice Guo at iba niyang associates, associated sa kanya, nung nakaraang weekend na nag-provide ng security assistance ang PNP yung mga personnel ng senate sergeant at arms na ito.”
Kaangot sini, ginpahayag naman ni Senator Risa Hontiveros, chairperson sang Senate Committee on Women, Children, Family Relations, and Gender Equality, nga ginmanduan man ang walo nga mag-atubang sa iya komitiba sa Hulyo 29.
Ang mga subpoena ang ginpirmahan ni Hontiveros kag inaprubahan ni Senate President Francis Escudero.
