ILOILO CITY – Ginpatpat sang Iloilo Provincial Veterinary Office ang nagkalain-lain nga mga requirements sang mga naga-transport sang baboy sa probinsya agud nga maka-agi sa mga border control points sa nagkalain-lain nga mga banwa.
Sa interview sang Bombo Radyo kay Dr. Darel Tabuada, head sang Iloilo Provincial Veterinary Office, iya ginpahayag nga istrikto nga ginapangita sa mga checkpoints ang mga masunod base sa Department of Agriculture Administrative Order No. 05 series of 2012:
*veterinary health certificate ukon animal health certificate nagikan sa Municipal Agriculturist Office
*barangay certification halin sa area of origin
*dapat ang salakyan nga ginakargahan ang napaidalom sa disinfection pinaagi sa pagpakita sang certificate of disinfection nagikan sa banwa kun sa diin ini naghalin
*dapat ang salakyan ang may yara sang registered livestock transport license nga ginkuha nagikan sa Department of Agriculture
Samtang, ginpahayag dugang ni Tabuada nga padayon sa gihapon ang ila imbestigasyon sa kun paano nga nagpositibo sa African swine fever ang mga baboy sa banwa sang Oton.
