Ginpa-Bombo sang mga residente sang St. Joseph Subdivision sa Cubay, Jaro, Iloilo City ang ila reklamo batok sa mga heavy truck kag construction equipment nga nagaagi kag naga-park sa kilid sang dalan.
Angot ini sa ginapatindog nga 3-storey, 12-classroom building sa Cubay Jaro Elementary School.
Sa interview sang Bombo Radyo kay Engr. Chris Paras, ginpahayag sini nga maayo ang intensyon sang proyekto apang dapat man kuntani hatagan sang pagtamod ang epekto sini sa mga residente.
Suno sa iya, bangud sang madamo nga truck nga nagaagi, nagkalaguba kag nag-crack ang dalan.
Nag-usmod man ang kilid sang dalan kag nagbilin sang duta kag mga bato nga nagahatag sang perwisyo sa mga nagaagi.
Suno sa mga pumuluyo, bisan kaagahon naga-deliver sang mga materyales kag nakadisturbo man ang operasyon sang mga truck.
Ang proyekto may kabug-usan nga budget nga ₱51.488 milyon kag ginapatuman sang Iloilo City Government sa idalum sang City Engineer’s Office.
Ang AD Pendon Construction and Supply Incorporated amo ang contractor sang proyekto.
Nahibaluan nga ang proyekto gin-umpisahan sang Agosto sini nga tuig kag ginapaabot nga matapos sa Agosto 2026.
Ginapanawagan sang mga residente nga tagaan sang City Government sang pagtamod ang ila.
Text: Cherie Mae Marcon
