Naga-preparar sa gihapon sang emergency plan ang gobyerno sang Germany kun hinali nga maglain ang pinsar ni Russian President Vladimir Putin kag manukot ini liwat sang rubles bilang bayad sang ila gina-deliver nga gas supply.
Ini apisar ginkumpirma naman ni German Chancellor Olaf Scholz nga nagpasalig na si Putin nga batunon na sang Russia ang bayad nga euros ukon dollars.
Kun balik-balikan, sang nagligad nga semana, nagpaandam si Putin nga rubles lang ang iya nga batunon nga bayad halin sa European Union nations, kag kun indi sila maka-comply, utdon sang Russia ang gas supply.
Ini nga demand ang gin-reject sang Germany kag sang G7 group sang nagapanguna nga developed economies.
Apang sa latest development suno kay Bombo International Correspondent Aimee Hilger direkta sa Germany, nagpasugot na liwat si Putin nga magbayad ang Germany sa Gazprom Bank, bangko nga wala ginpatawan sang sanctions, kag ini ang iga-transfer sa Russia sa rubles nga currency.
Sa subong, wala nagakumpyansa ang Germany kag naka-isyu naman sang early warning sa mga tawo batok sa posible kakulangan sa gas kun may pagbag-o nga matabo sa desisyon ni Putin.
Sa abiso sang gobyerno, bastante subong ang gas sa amo nga pungsod apang ginhingyo sa mga pumuluyo nga magkinot sa paggamit sang sini sa ila nga mga puluy-an.
Sa alert levels sa Germany, ang early warning amo ang pinakauna; kag kun maglala ang sitwasyon, ginadeklarar ang alarm, kag sunod amo ang emergency.
