Apat na ka bulan nga gina-antos sang mga residente sa Sitio Malunoy, Barangay Pangi, San Dionisio, Iloilo ang ila ginaagyan nga dalan nga tuman ka lutak kag danlog.
Sa interview sang Bombo Radyo kay Emok Balome, isa sa mga residente sa amo nga lugar, iya ginpahayag nga kapin apat ka kilometros ang kalawigon sang farm to market road.
Suno kay Balomes, nagapanghakroy ang mga pumuluyo ilabi na bangud nabudlayan sila nga mapagwa ang ila na-harvest nga mga mais.
Subong nga bulan, tigparanggas na sang mais suno kay Balome apang may yara pa gihapon nga mga na-harvest nga mais nga wala nadala sa merkado bangud sa tuman ka lutak nga dalan.
May mga nagasulod man kuntani nga motorsiklo apang nagakadanlog ang iban suno kay Balome kag ginabululigan lang tulod sang iban nga mga tawo.
Paagi sa isa ka resolution, naghingyo man sang bulig ang mga barangay officials sa opisina ni Congressman Raul ‘Boboy’ Tupas agud mapasemento ang ila nga dalan.
