Bangud sa kakulba sa coronavirus kag kakulang sang mga ospital nga makasarang sa pagtatap sa mga pasyente, nakontento na ang pila ka mga residente sa India nga magpakonsulta sa iligal nga mga clinic.
Sa Parsaul village, halos 60 killometros ang kalayuon halin kapital sang India nga New Delhi, isa ka Indian former hospital worker nga wala sang nagakaigu nga medical education ang reported nga nagapadalagan sang gamay kag indi lisensyado nga clinic kun sa diin nagapadulong ang mga tawo nga nabudlayan magginhawa.
May gamay lang nga katre nga nakabutang sa lutakon nga duta; ang iban nga mga pasyente ang nagasuksok man sang face mask samtang nagahigda samtang ang iban ang nagapanabon lang sang tela ukon anuman nga panapton.
Sa subong santo sa data sang health department, nagsaka na sa masobra 26.3 million ang kaso sang COVID-19 sa India — ikaduha sa pinakamataas nga rekord sa kalibutan, sunod sa Estados Unidos. Ang numero naman sang mga napatay ang yara na sa kapin 296,000. — with a report from Reuters
