Ginmandu ang pag-evacuate sang masobra 700 ka mga pamilya ukon malapit 3,000 ka mga indibidwal nga nagapuyo sa sulod sang six-kilometer Permanent Danger Zone sang Bulkan Mayon sa Albay.
Suno sa Office of Civil Defense sa Bicol, nagpadala na ang lokal nga pamunuan sang mga Army truck agud nga mapadasig ang paghakot sa mga residente.
Magatipon man ang response cluster sang Regional Disaster Risk Reduction and Management Council subong nga adlaw para masiguro ang suporta sa mga evacuees.
May ginbutang naman nga checkpoints sa palibot sang bulkan agud wala na sang makasulod sa permanent danger zone.
Kahapon, Enero 6, sang ginpasaka sa Alert Level 3 ang status sang bulkan bangud sa pyroclastic density current ukon “uson” nga makamamatay para sa mga tawo.
Suno sa Philippine Institute of Volcanology and Seismology (Phivolcs), ang pag-collapse sang lava dome ukon ang lava nga nagtipon kag nagtig-a sa tuktok sang Mayon, ang nagpaguwa sang pyroclastic density currents (PDCs) sa southeast side sang bulkan.
Katapusan nga napaidalom ang Mayon sa Alert Level 3 sadtong Hunyo 2023 bangud man sang effusive magmatic eruption.
Ang alert levels nagahalin sa 1 tubtub 5. Ang Level 5 nagakahulugan nga may yara na sang hazardous eruption.
