Iloilo – Ginpa-Bombo sang mga residente sang Bangga 5, Barangay Hibao-an, Pavia, Iloilo ang developer nga nagkudal sang ila alagyan apisar nga wala sang nagaka-igo nga bayad.
Sa interview sang Bombo Radyo kay Ranulfo Jabinigay, residente sang amo nga barangay, iya ginpahayag nga kulang ang bayad sang private developer kun sa diin P2,000 lang ang ginhatag sa baylo sang ginpromisa nga P10,000.
Suno kay Jabinigay, mapahimo ini sang hagdan agud makasaka kag makalab-ot sa ila balay.
Dugang pa sang natungdan, ang pagpakudal sang alagyan ang tikang sang developer agud nga mapahalin ang mga residente.
Nagpanindugan naman ini nga may yara sila sang ginakaptan nga court order nga makapamatuod nga indi mahimo nga makudalan ang ila nga lugar.
