JANIUAY, ILOILO – Nagpanawagan ang mga opisyales sa mga pumuluyo sang Barangay Bongol, Janiuay, Iloilo nga mag-aligmat kasunod sang makatilingala nga pagkapatay sang 27 ka mga pabo sa lugar.
Sa interview sang Bombo Radyo kay Barangay Kagawad Regelio Tirados, iya ginpahayag nga dapat bantayan sang mga residente ang ila kasapatan agud nga indi na madugangan ang mga napatay nga pabo.
Suno kay Tirados, ginkakugmat sang mga residente ang natabo nga pag-atake sa mga kasapatan bangud ini ang labing-una nga natabo sa ila lugar.
Ginpahayag man ni Tirados nga wala man sang naguba sa kudal sang lugar kun sa diin nahamtang ang mga pabo.
Nahibaluan nga sang nasapwan ang mga patay nga pabo, wala na ini sang mga kasudlan kag dugo.
