ILOILO CITY — Ginkadismaya sang mga residente sang Barangay Don Esteban, Lapuz, Iloilo City ang indi matapos-tapos nga multipurpose building sa ila lugar.
Sa interview sang Bombo Radyo kay Punong Barangay Efren Cenayo, iya ginpahayag nga apisar may makita siya nga pila ka mga trabahador, pending sa gihapon ang construction sang multipurpose building.
Suno kay Cenayo, may mga ginapangayo ang Department of Public Works and Highways (DPWH) Region 6 nga dokumento para sa compliance agud mapadayon ang pagtukod sang amo nga imprastraktura.
Ginkwestyon naman ni Cenayo ang ahensya kun ngaa subong lang sila nakadumdum sang mga dokumento kun sa diin, nakatindog na ang proyekto.
Ginpahayag man sang natungdan nga bangud sa wala makompleto ang mga materyales, nagapabilin nga wala nahuman ang building.
Nahibaluan nga ang nasambit nga proyekto ang ginpondohan sang Iloilo City Government sang P5 million agud matukod kag magamit sang mga pumuluyo.
