ILOILO CITY — Ginreklamo sang mga residente sang Barangay Ingore, Lapaz, Iloilo City ang ginatukod nga proyekto nga Feed Mill sang La Filipina Uy Gongco bangud sa yab-ok nga ginatuga sini.
Sa interview sang Bombo Radyo kay Janet Jayona, residente sang amo nga lugar, iya ginpahayag nga ang yab-ok nga nagahalin sa proyekto ang natuga sang nanari-sari nga balatian sa iya pamilya.
Suno kay Jayona, sugod sang nag-untat sang watering ang kompaniya, naglinupad na gid ang mga yab-ok, sa diin nagtuga sang pagkasip-on, skin allergy, kag hilanat sa iya nga mga kabataan.
Ginpahayag man sang natungdan nga ginbutangan man sang kompanya sang trapal ang palibot sang gina-construct nga feed mill, apang nagapaibabaw sa gihapon ang yab-ok.
Nagalaum naman si Jayona nga mahatagan sang solusyon ang amo nga problema agud indi na maglala pa ang matuga sini nga huol sa ila nga mga pumuluyo.
Nagsabat naman ang opisyal sang Barangay Ingore, Lapaz, Iloilo City sa problema sa yab-ok nga natuga sang feed mill nga proyekto sang La Filipina Uy Gongco.
Sa interview sang Bombo Radyo kay Punong Barangay Charity Montelejao, iya ginpahayag nga ika-duha na sang nagpatuman sang public consultation ang ila barangay kaupod ang nasambit nga kompanya agud abisohan ang mga residente sa ginatukod nga proyekto.
Suno kay Montelejao, ginreklamo man sang mga resdente ang bubon nga gin-construct sang kompanya, nga ginapahayag, nagtuga man sang pag-gamay sang unod sang bubon sang mga residente.
Ginpahayag man sang opisyal nga napalab-ot na ang reklamo sa Department of Environment and Natural Resources (DENR) agud inspeksyonon ang mga dokumento sang proyekto kun sila ang naka-comply sang mga reuqirements nga nagapahanugot nga makapatindog sila sang feed mill sa lugar.
Nahibaluan nga una na naghatag sang bulig ang kompanya sang feed mill sa mga residente nga naapektohan sang ila proyekto, ilabi na ang mga nagmalasakit tungod sa yab-ok.
Nagpasalig naman ang natungdan nga padayunon ang watering sa lugar kag liwat nga lab-uton sini ang kontraktor sang La Filipina Uy Gongco agud nga matutokan kag ma-address ang amo nga problema.
