ILOILO CITY — Nagakabalaka ang mga residente sang Barangay Rizal Pala-Pala 1, 2, kag Barangay Rizal Estanzuela, Iloilo City sa posibilidad nga indi matapos ang proyekto nga dike sang Iloilo City Government.
Sa interview sang Bombo Radyo kay Neriza Uytoco, residente sang Brgy. Rizal Pala-Pala II, iya ginpahayag nga ang construction sang dike ang magaserbe nga proteksyon batok sa balod kag mga kalamidad nga posible magtupa sa lugar kun tag-ululan.
Suno kay Uytoco, kun matapos ang dike, mangin dako ini nga bulig para sa ila, ilabi na nga nagabilin sang madamo nga basura ang nagasulod nga tubig baha kag balod.
Ginpahayag man sini nga bangud sa masami nga nagasulod ang baha kag balod sa ila, mas ginpili na lang nila nga pataasan ang ila nga flooring line agud nga indi malab-ot sang baha.
Nagalaum naman sila nga gilayon matapos ang amo nga proyekto bangud dako ang mabulig sini agud protektahan sila batok sa high tide.
