ILOILO CITY — Ginkatingala sang mga residente sang Brgy. Magdalo, Lapaz, Iloilo City ang multipurpose building nga proyekto sa ila lugar bangud gulpiyada nga nag-untat ang konstruksyon.
Sa interview sang Bombo Radyo kay Punong Barangay Romeo Carr, iya ginpahayag nga natapos na sang contactor ang una nga phase sang multipurpose building sa diin may budget nga P5 million.
Suno kay Carr, ang dingding sang imprastraktura ang nagapabilin nga wala pa ma-finishing, samtang ang salog ang wala pa man sang tiles, kag kulang pa sang electrical facilities.
Ginpahayag man sang natungdan nga sang bulan pa sang Pebrero sang ulihi nakit-an nga may naga-ubra nga trabahador sa amo nga building.
Nahibaluan nga nagdugang ang Iloilo City Government sang additional nga P5 million agud matapos ang proyekto.
Nakatalana naman nga sa bulan sang Hunyo masugod liwat ang paghuman sang multipurpose building.
