Amat-amat na nga gin-evacuate ang mga residente sa pila ka mga banwa sa Leyte kag Davao de Oro bangud sa pagbaha nga dala sang mamunog nga pag-ulan.
Ginpahayag nga halos lebel na sang dughan ang kadalumon sang tubig baha sa banwa sang Compostela, Davao de Oro.
Suno sa Compostela LGU, nagpatigayon sila sang forced evacuation sa tanan nga mga residente nga naga-istar sa mga nanubuan nga parte sang lugar kag ginadala sa mga evacuation center.
Suspendido man ang klase bangud sa malain nga tyempo.
Apektado naman sang landslide ang Nabunturan-Maragusan road sa Sitio Salaysayon, Barangay Cambagang sa banwa sang Maragusan matapos nga nagdaus-us ang duta.
Suno sa Maragusan Municipal Disaster Risk Reduction and Management Office (MDRRMO), indi na maagyan ang mga dalan kag padayon ang clearing operation sa lugar.
Tuman naman ka baskog ang pag-ilig sang tubig baha sa banwa sang San Ricardo, Southern Leyte.
Nagkalatumba man ang pila ka mga kahoy sa Abuyog, Leyte kag naapektuhan ang pila ka mga poste kag linya sang kuryente nga nagtuga sang brownout.
Suno naman sa PAGASA, isa ka Low Pressure Area (LPA) ang nagadala sang mamunog nga pag-ulan sa Visayas kag Mindanao.
