Nangin isa ka kahigayonan para sa mga residente sang Timawa Tanza II, Iloilo City ang Fiesta Minatay bangud man sa nangin sideline ini nila agud nga makakwarta.
Sa interview sang Bombo Radyo kay Micar Flores, Secretary sang Barangay Timawa Tanza II, Iloilo City, iya ginpahayag nga may mga sepoltorero na nga daan ang naka-assign sa pila ka mga panchon sang nagtaliwan agud man nga malimpyohan ini.
Suno kay Flores, mahimo gid nga mapakapangayo sang bulig sa mga sepoltorero ang mga himata nga may luyag nga palimpyohan.
Mahimo naman nga magpakig-angot sila sa barangay officials sang lugar paagi sa pagpadulong sa barangay hall.
Ginpahayag man sang sekretarya nga may naka-standby man nga mga tanod sa palibot kon may ipalihog ang mga nagapadulong sa patyo.
Nahibaluan nga may gin-deploy man ang Iloilo City Police Office (ICPO) nga police personnel sa lugar agud nga mapabilin ang kalinong kag katawhay sang patyo.
