ILOILO CITY – Tuman ang kalipay sang mga residente matapos naghatag ang Bombo Radyo Foundation, Incorporated kag Flowater Resources Iloilo, Incorporated sang 8,000 liters nga potable water ukon sarang nga mainom nga tubig sa Barangay Zamora-Melliza, Iloilo City.
Ini nga lihok ang sa tunga man sang ginapangatubang nga water shortage sa Iloilo City.
Sa interview sang Bombo Radyo kay Ailyn Cataquez, residente sang Barangay Zamora-Melliza, Iloilo City, iya ginpahayag nga nagapasalamat ini sa kaalwan sang Bombo Radyo Foundation, Incorporated kag Flowater Resources Iloilo, Incorporated sa pagdonar sang tubig-ilimnon.
Suno kay Cataquez, ini nga tubig ang tuman ka dako nga bulig para sa ila ilabi na nga nagabakal sila adlaw-adlaw agud matatapan ang ila kinahanglanon sa tubig.
Ginpahayag man ni Cataquez nga makalab-ot sa lima ka gallon ang mabakal sini nga tubig adlaw-adlaw agud gamiton sang iya pito ka mga kabataan.
Nagapasalamat naman ang pila ka mga opisyal sang amo nga barangay bangud nalakip ang ila lugar sa nakabaton sang libre nga tubig.
Suno kay Barangay Kagawad Yuri Villanueva, iya ginpahayag nga dako nga bulig ang 8,000 liters nga tubig sa ila residente ilabi na nga pila sa mga households ang nagakaubosan na sang tubig.
Nahibaluan nga una na nga naghatag ang Bombo Radyo Foundation, Incorporated kag Flowater Resources, Iloilo Incorporated sang 8,000 liters kag 12,400 liters nga tubig sang Mayo 1 kag Mayo 6.
