ILOILO CITY- May yara sang nagkalain-lain nga diskarte sa tagsa ka restaurant sa syudad sang Iloilo agud mapatuman ang physical distancing kadungan sang pagpahanugot sang dine-in apang limitado lamang sa 50% capacity.
Sa interview sang Bombo Radyo kay Roselyn Panes, Area Manager sang isa ka restaurant sa dalan JM Basa sa City Proper, iya ginpahayag nga hugot nga ginapatuman ang physical distancing kag iban pa nga health protocols.
Suno kay Panes, isa lang ka tawo ang mahimo makakaon sa isa ka lamesa.
Agud malingaw ang mga nagahulat sang order, may yara sang ginbutang nga qoutations sa tagsa ka lamesa kun sa diin nakasulat ang mensahe sa heart shape nga speech balloon.
Ginpahayag naman ni Lucyl Lucena, isa sa mga customer, nga ini ang labing una nga bes nga indi sila magka-upod sang iya bana sa isa ka lamesa sa tion nga magkaun sa restaurant.
Suno kay Lucena, nahangpan niya kun nga-a kinahanglan ipatuman ang physical distancing bangud ini ang para sa kaayuhan sang tanan.
