LAMBUNAO, ILOILO – Padayon pa nga gina-imbestigaran sang mga otoridad ang natabo nga pagkatumba ang Calinog Bus Line (CBL) sa Brgy. Magbato, Lambunao Iloilo.
Ang bus ang ginamaneho ni Marwin Terasol, Jr.
Sakay man sang bus ang conductor kag tatlo ka mga pasahero.
Sa interview sang Bombo Radyo kay Police Major Roy Tayona, hepe sang Lambunao Municipal Police Station, iya ginpahayag nga naghalin ang bus sa Calinog, Iloilo kag padulong kuntani sa Iloilo City.
Suno kay Tayona, nag-overtake ang bus sa isa ka salakyan, apang bangud madanlog ang dalan, wala na nakontrol sang driver ang iya manibela.
Nagbunggo naman sa kudal sang isa ka balay ang bus.
Ginahibalo man ang pulis ang report nga nagakareka ang bus rason nga naaksidente ini.
Samtang, suno naman kay Lambunao, Iloilo Vice Mayor Arvin Losaria, yara na sa maayo nga kahimtangan ang mga pasahero sang bus.
Ginpanugyanan man sini ang mga driver nga maghalong sa pagmaneho sa nasambit nga dalan bangud masami nga may nagakaaksidente sa lugar.
