ILOILO CITY – Padayon nga nagadagsa ang mga salakyan sa Iloilo Commercial Port Complex Loboc, Lapuz Norte, Iloilo City agud magpadulong sa Guimaras.
Ini ang kadungan man sang pag-umpisa sang highlight sang Manggahan Festival nga nag-umpisa subong nga adlaw kag magalawig tubtub Mayo 22 sa diin ang ginabantayan amo ang “Mango-Eat-All-You-Can”.
Apang antes sini may yara na sang ginpatigayon nga mga aktibidad humalin sang Abril 29.
Sa inteview sang Bombo Radyo kay Gene Boy Gabasa, operations Supervisor sang Montenegro Shipping Lines Incorporated, iya ginpahayag nga temprano pa lang nagapila na ang mga salakyan sa pantalan sa diin kalabanan sa mga ini ang pribado nga salakyan.
Suno kay Gabasa, ang byahe via Iloilo -Guimaras and vice versa ang naga-umpisa las 6:00 sa aga kag magalawig naman tubtub las 12:00 sang tungang gab-i.
Samtang ang byahe naman via Guimaras- Iloilo and vice versa ang naga-umpisa las 7:00 sang aga kag magalawig naman tubtub las 12:00 sang tungang gab-i.
Ang pagbag-o sang byahe sang Roll-On Roll-Off vessel ang santo man sa request sang Guimaras Provincial Government sa Martime Industry Authority Region 6 nga palawigon ang day time kag night time nga byahe sang mga sakayang pandagat agud may sakyan ang mga turista kag bisita nga magatambong sa Manggahan Festival.
Ini ang pirmado naman ni Martime Industry Authority Region 6 Director Jeffrey Bangsa santo sa MARINA Advisory No. 2015-10 ukon ang Guidelines during Emergency, Holiday Season and Special Occassion partikular sa paragraph 3 sa diin nasaad nga ang paglawig sang pagbyahe sang sakayang pandagat.
Ang Roll-On Roll-Off vessel ang mahimo na maglarga sa tion nga mapuno na ang sakayang pandagat ukon magdangat na sa isa ka oras kag tunga nga paghulat sang mga pasahero.
Magluwas sa Roll-On Roll-Off vessel, ginpalawig man ang byahe sang fiberglass motorboat umpisa las 5:00 sang kaagahon tubtub las 2:00 sa kaagahon.
Ini nga mando ang nag-umpisa sang Abril 29 kag magalawig tubtub sa madason nga Lunes, Mayo 22.
Sa Myerkules, Mayo 23, balik naman sa normal ang byahe sang Roll-On Roll-Off vessel umpisa las 6:00 sang aga tubtub las 6:00 sang gab-i.
Samtang ang fiberglass motorboat naman ang magabyahe liwat las 5:00 sa kaagahon tubtub las 9:00 sang gab-i.
