Temporaryo nga ginadumilian nga maglabay sa Jalaur Bridge sa Iloilo City–Leganes–Dumangas Coastal Road sa Brgy. Nabitasan, Leganes, Iloilo ang mga salakyan nga masobra lima ka tonelada ang kabug-aton.
Sandig sa abiso sang Department of Public Works and Highways (DPWH) Western Visayas, bangud ini sa “significant structural damage” sa taytay.
Suno pa sa ahensya, magapabilin ang restriction tubtub nga matapos ang mayor nga pagkaayo nga subong nagapadayon pa.
Ginaabisuhan man ang mga motorista nga maglabay anay sa designated alternative routes depende kun sa diin sila naghalin kag kun sa diin sila magkadto.
Sa interview naman sang Bombo Radyo kay Iloilo Fourth District Board Member Rolando Distura, chairman sang Committee on Transportation sa Sangguniang Panlalawigan, iya ginpahayag nga masobra na sa 30-anyos ang amo nga taytay.
Suno kay Distura, sang una pa lamang, ginpalab-ot na sini sa district engineer ang nanotisyaran nga displacement sa transition slab kag nalipay siya nga naghulag gilayon ang ahensya.
Gilayon nga ginsirado ang tuo nga bahin sang taytay (kun halin ang motorista sa Leganes), apang bangud sa kadamuon sang dalagku nga salakyan nga nagalabay, nakit-an naman ang displacement sa wala nga bahin.
Ini suno sa iya ang rason sang major repair works sang DPWH Region VI.
Nagpangabay si Distura sa publiko nga kun masobra sa kabug-aton ang salakyan sandig sa nakabutang sa restrictions, indi na magrisgo pa sa paglabay.
