BATANGAS – Nagdangat na sa 18,646 ka mga pamilya ang yara sa subong sa 287 ka mga evacuation center sa Batangas bangud sa paglupok sang Bulkan Taal.
Sa interview sang Bombo Radyo kay Joselito Castro, pinuno sang Provincial Disaster Risk Reduction and Management Office sang Batangas, iya ginpahayag nga padayon sa gihapon nga gina evacute sang mga otoridad ang mga pumuluyo sa lugar sa diin kinahanglan madala ini sa lugar 40 tubtob 50 kilometros ang kalayuon bulkan taal.
Suno kay Castro, may yara sang mga paglitik nga nakit-an sa duta malapit sa bulkan kag ini ang tuga sang magma nga nagahulag.
May yara man sang contingency plan ang Provincial Disaster Risk Reduction and Management Office bangud posible nga magalawig pa ang eruption sang bulkan.
Base sa history sang Bulkan Taal, nahibaluan nga may yara sang hitabo nga nagdugay ang serye sang eruption sang bulkan sa sulod sang anom ka bulkan kag ini ang ginakahangaw-an sang otoridad subong.
Pahayag niya, prayoridad sang Local Government Unit ang rescue kag relief operations para sa mga pumuluyo.
Ginahitso man sang Provincial Disaster Risk Reduction and Management Office ang clearing operations sa lugar sa bulig sang Department of Public Works and Highways agud nga malimpyohan ang mga dalan, establisimento, salakyan kag mga balay nga natabonan sang abo.
Dugang pa sang natungdan, may yara naman sang lugar nga natalana para sa mga sapat nga ginpang-evacuate bangud kaangay sang tawo, may yara man ini sang kabuhi.
Samtang indi naman advisable nga magkaon sang seafood bangud posible nga apektado ini sang ash fall.
Sa subong, nagakinahanglan sang pagkaon, bulong kag hygiene kit ang mga evacuees nga nagapabilin sa evacuation centers.
Sa luyag nga magbulig, makig-angot lang sa numero direkta sa Provincial Disaster Risk Reduction and Management Office (043)723-9350 ukon sa Iloilo City Government.
