ILOILO CITY-Nagpaathag ang Provincial Helath Office sang Iloilo kun nga-a nakalusot sa community quarantine ang tatlo ka mga seaman nga naghalin sa Egypt-Dubai-Cebu nga may yara sang kaso sang Coronavirus Disease 2019 (COVID-19).
Sa interview sang Bombo Radyo kay Dr. Patricia Trabado, Provincial Health Officer, iya ginpahayag nga may yara sang ginpakita nga papeles ang tatlo ka seaman kag sila ang ginakabig nga Persons Under Monitoring bangud nga wala man sila sang sintomas sang virus.
Suno kay Trabado, ang ila lang amo ang pagpasigurado nga makapauli ang tatlo sa ila tagsa ka panimalay kag magpaidalom sa self quarantine sa sulod sang 14 ka adlaw.
Ginpahayag ni Trabado nga kun gin-hold ang tatlo ka seaman nga tumandok sang Capiz, wala sang temporary quarantine area para sa ila.
