ILOILO CITY – Istoryahan sang mga senador kun ano nga mga ahensya sang gobyerno ang mabilin nga wala sang confidential fund.
Suno kay Senate Finance Committee Chairman Senator Sonny Angara, ang tagsa ka senador ang may yara sang opinyon.
Pahayag niya, may yara nga gusto nga kuhaon nalang ini kag may yara man nga gusto lamang nga buhinan.
Dugang pa niya, kinahanglan nila nga makahimo sang consensus.
Ini ang sabat ni Angara may kaangtanan sa kun paano i-settle sang Senado ang confidential fund issue kasunod sang pagbasura sang Small Committee sang House of Representatives sang request sang confidential fund sang Office of the Vice President, Department of Education, Department of Agriculture, kag sang Department of Information and Communication Technology.
Lakip man sa listahan ang Department of Foreign Affairs.
Apang gin-athag ni Foreign Affairs Secretary Enrique Manalo sa budget presentation sa Senate Finance Committee hearing nga ang iya ahensya ang wala naga-request sang confidential fund.
Suno kay Angara, kinahanglan sang mga senador nga diskusyunan ang issue sa confidential funds lakip na ang mga “standards” nga dapat nga lantawon sang mga ahensya agud nga mahatagan sang amo nga pondo.
Ginpasiguro naman ni Senate Majority Leader Joel Villanueva ang publiko nga id-idan nila ang 2024 national budget.
Padayon man ang pagtsekyar sang Select Oversight Committee on Intelligence Funds, nga ginavug-usan nanday Senate President Juan Miguel Zubiri, Senate Majority Leader Joel Villanueva, Senate Minority Leader Aquilino “Koko” Pimentel III, Senate President Pro Tempore Loren Legarda, Senator Ronald “Bato” dela Rosa kag Angara, ang spending record sang mga ahensya nga nakabaton sang confidential fund humalin sang 2022 tubtob 2023.
Suportado naman ni Angara ang una nga pahayag ni Zubiri nga ang mga ahensya lamang nga may defined confidential fund spending ang ikonsiderar nga hatagan sang amo nga pondo sa masunod nga tuig.
Ginpahayag naman ni Senate Minority Leader Pimentel nga dapat nga buhinan man ang confidential fund sang Office of the President.
