ILOILO– Indi kumbinso ang mga sidewalk vendors sa ginhatag nga option sang Iloilo city government natuhoy sa pagpahalin sa ila sa mga sidewalks sa syudad.
Sa interview sang Bombo Radyo kay Jimmy Durado, federation president sang Iloilo City Sidewalk Vendors Association iya ginpahayag nga na apresyar nila ang malip-ot nga tiyempo nga ginhatag ni Mayor Jerry Treñas agud ma istorya sila.
Apang nagpahayag sang pagkadismaya si Durado bangud wala sila nahatagan sang kahigayunan nga makahambal agud ipalab-ot ang ila nga bahin.
Nahibaluan nagpatigayon sang pagsinapol kahapon si Mayor Jerry Treñas kaupod ang mga sidewalk vendors nga gintambungan man sang mga tiglawas sang Department of Social Welfare and Development, City Social Welfare and Development Office, mga market incharge, Public Safety and Transportation Management Office, Task Force on Anti-Squatting and Illegal Structures Unit kag Publc Employment Service Office kun sa diin na istoryahan ang mga lihok nga patigayunon agud mabuligan ang mga sidewalk vendors.
Suno kay Durado nagapasalamat sila sa P5,000 nga financial assistance nga ila pagabatunon nagikan sa Iloilo City Government apang indi sila pabor sa gintalana nga duha ka lugar kun sa diin nila mahimo nga ipahamtang ang ila mga baligyaan.// Dugang sang natungdan indi ma akomodar sang ginhatag nga lugar ang linibo nga mga vendors kag indi ini masami agyan sang tawo gani mangin mahina ang baligyaanay diri.
Santo sa pahayag ni Durado ma file sila sang petisyon sa Department of Interior and Local Government nga nagahingyo nga hatagan sila sang konsiderasyon nga padayon nga magbaligya sa mga sidewalks sa kondisyon nga indi sila mangin sablag sa dalan.
Madumduman nga ginhatagan ni Mayor Jerry Trenas sang pito ka adlaw ang mga sidewalk vendors agud halinon ang ila mga baligya.
