ILOILO CITY-Natalana na nga magasaylo Cacho Property buwas, Lunes, ang sidewalk vendors sang syudad sang Iloilo.
Sa interview sang Bombo Radyo kay Mr. Jimmy Dorado, Presidente sang Vendors Association sa syudad sang Iloilo, iya ginpahayag nga subong tubtob buwas nga adlaw ang ila plaso agud magsaylo sang baligyaan matapos sang Oplan Hawan.
Suno kay Dorado, nagalab-ot sa 254 ka mga pangalan sang vendors ang igapa raffle sa Cacho Property.
Samtang, ginpahayag naman ni Baby Merced, isa sa mga vendors sa Iloilo Central Market, nga subong nga adlaw, natalana ang ila pagsaylo sa bag-o nga pwesto nga ginhatag sa ila.
Suno kay Merced, indi sila kumportable sa bag-o nila nga pagasayluhan bangud posible sa likod nga bahin ang ila pwesto.
Handa naman siya suno kay Merced nga magsunod sa kun ano man ang mangin patakaran sa pagsaylo nila sa ila bag-o nga pwesto.
Sa pihak nga bahin, nagareklamo naman ang mga manugbaligya sang ubod bangud nga tuman ka budlay para sa ila ang magsaylo sang pwesto.
Sa interview sang Bombo Radyo kay Sotera Florentino, iya ginpahayag nga indi mahimo nga sayluhon ang ila pwesto malapit sa baligyaan sang mga karne.
Mabudlay suno kay Florentino bangud magutok ang lugar kag halos indi sila makaplastar sang ila baligya bangud nga nagadanaw man sa tion nga mag-ulan ang pwesto nga ila sayluhan.
Kun tani suno sa natungdan mahatagan sila sang mas maayo nga pwesto agud nga makabaligya.
