Nagapadayon subong ang pagpatigayon sang structural integrity assessment sa tanan nga mga simbahan nga sakop sang Archdiocese of Jaro.
Ini ang kasunod sang nangin mandu ni Jaro Archbishop His Grace Most Rev. Midyphil B. Billones, D.D. matapos nagluntad ang 6.9 magnitude nga linog sa Cebu sang Martes sang gab-i, Septyembre 30, nga nagtay-og sa madamo nga areas sa Western Visayas.
Sa interview sang Bombo Radyo kay Reverend Father Angelo Colada, director sang Jaro Archdiocese-Social Communication Office, iya ginpahayag nga nagpatawag ang mga simbahan sang mga eksperto kaangay sang engineers kag mga personnel sang Municipal Disaster Risk Reduction and Management Office (MDRRMO) agud malantaw kun may mga litik ukon may deperensya ang estruktura.
Importante ini suno sa iya ilabi na nga kilala ang Iloilo nga madamo sang heritage churches.
Sa Molo Church nga amo ang nagaisahanon nga Gothic-Renaissance church sa guwa sang Manila, natukiban sa inspeksyon nga may mga magagmay nga litik sa pader apang wala man na-kompromiso ang kabug-usan nga structural integrity sang estruktura.
Suno sa Archdiocese, nagapabilin nga safe ang simbahan para sa mga liturgical celebrations kag iban pa nga mga aktibidad sang Parokya.
Sa Jaro Metropolitan Cathedral naman ukon sa National Shrine of Our Lady of the Candles nga isa ka historical landmark, nauna na nga gin-anunsyo nga gin-reschedule sa Oktubre 27 ang Diaconal Ordination nga natalana kuntani nga hiwaton sang Oktubre 2.
Nahibaluan nga sa Cebu, nagmandu man si Archbishop Alberto Uy sang structural assessment sa tanan nga mga simbahan kag rectories sa probinsya. Ginaplano man sang church officials ang pag-restore sa century-old ngaArchdiocesan Shrine of Santa Rosa de Lima sa banwa sang Daanbantayan matapos ang dako nga halit tuga sang Intensity 7.#
(Photo: Archdiocese of Jaro)
