ILOILO CITY – Apisar nga yara na sa alert level 1 ang Iloilo City tubtob sa Marso 15, padayon sa gihapon ang pagpatuman sang physical distancing sa mga simbahan sa syudad.
Kahapon sa ginpatigayon nga mga misa, wala ginpatuman ang 100% seating capacity nga ginapahanugutan sa mga lugar nga yara na sa alert level 1.
Sa interview sang Bombo Radyo kay Rev. Fr. Angelo Colada, director sang Commission on Social Communication sang Archdiocese of Jaro, iya ginpahayag nga gindugangan gid lamang sang markers ang mga pulungkuan sa mga simbahan sang syudad agud nga masunod sa gihapon ang physical distancing.
Dako naman ang epekto sang re-classification bangud mas madamo pa nga mga tumulu-o ang mapasulod sa simbahan kag mahimo naman nga makatambong ang mga sumilimba nga sang una, nagtinir lang sa ila panimalay.
Samtang, nagpagwa na sang guidlines ang Archdiocese of Jaro may kaangtanan sa nagahilapit nga Semanta Santa.
Amat-amaton na suno sa opisyal ang pagbukas sang selebrasyon.
Pahanugutan na ang Visita Iglesia kag magadepende na sa tagsa ka kura paruko ang set up para sa patigayunon nga prusisyon.
