ILOILO CITY- May mabaton na nga monthly honorarium ang mga Sangguniang Kabataan members kalakip na ang treasurer kag secretary.
Ini matapos ginpirmahan ni President Rodrigo Duterte agud mangin layi ang Republic Act 11768 nga nagamando nga indi lang ang sangguniang kabataan chairperson ang magabaton sang honorarium kag iban nga benepisyo.
Sa interview sang Bombo Radyo kay Atty. Nestor Jeremy Moreno, law professor sa University of San Agustin College of Law, iya ginpahayag nga
sa amo nga layi, ang honorarium kada bulan ang i-charge sa SK funds kag i- grant sa pagtakop sang tagsa ka regular monthly SK meeting.
Apang, gin-athag ni Moreno nga nasaad diri nga ang honorarium ang indi pareho sa ginabaton sang SK chairperson kada bulan kag indi maglapaw sa 25% sang SK funds ang alokasyon para sa personnel services.
Nagakadapat ang barangay magpain sang 10% sang general fund para sa SK, sa diin ang Sangguniang Barangay ang magapain sang amo nga amount sang lump-sum para sa disbursement para sa youth development kag empowerment nga mga katuyuan.
Ang local government units mahimo man mag-provide sang dugang nga honorarium, social welfare contributions kag hazard pay sa SK chairperson upod sa iban nga elected kag appointed members paagi sa ila lokal nga ordinansa apang ini ang i-subject sa post-audit jurisdiction sang Commission on Audit.
Sa idalom sang bag-o nga layi, ang SK members ang entitled man para sa nagakaigo nga civil service eligibility base sa ila pila ka tuig nga serbisyo sa barangay santo sa Civil Service Commission rules and regulations.
Ang RA 11768 naga- exempt man sa SK leaders nga magpakigbahin sa National Service Training Program kag naga- excuse sa ila sa regular classes kun nagatambong sa regular ukon special meetings.
Ang layi nagapahanugot man sang paghatag sang PhilHealth coverage para sa mga youth leaders.
