ILOILO CITY – Hatagan sang bag-o nga orientation ang mga social worker sang Department of Social Welfare and Development sa rehiyon VI agud nga malikawan na ang mga reklamo nga indi maayo ang paminatasan sang iban nga staff.
Sa interview sang Bombo Radyo kay Department of Social Welfare and Development VI director Atty. Carmelo Nochete, iya ginpahayag nga ang mga nagapadulong sa ila talatapan ang yara sa tunga-tunga sang kabudlay, gani dapat gid nga hatagan sang pag-intindi kag dugang nga pasensya.
Dugang pa niya, ang pagserbisyo sa tawo ang nagakahulugan man sang pagserbisyo sa Ginuo.
Sa tion naman nga may yara sang social worker nga nakahimo sang sala, indi magduha-duha si Nochete nga disiplinahon ini.
Si Nochete, ang bag-o gid lamang nga nagsumpa bilang direktor sang ahensya sa rehiyon VI.
Antes nangin director, ginbaya-an ni Nochete ang iya posisyon bilang isa sa mga board members sang probinsya sang Iloilo.
