Gin-athag ni General Romeo Brawner Jr, chief of staff sang Armed Forces of the Philippines (AFP), nga wala lamang naghipos-hipos kundi nagbato ang mga soldado nga Pinoy sa kutob sang ila masarangan sang gin-atake sila sang tuman ka ka damo nga personnel sang China Coast Guard samtang ginapatigayon ang rotation and resupply mission sa BRP Sierra Madre sa Ayungin Shoal sa West Philippine Sea sang Hunyo 17.
Ginpahayag ini ni Brawner kadungan sang iya pagbisita sa tropa sang militar sa headquarters sang Western Command sa Palawan kun sa diin ginsab-itan man sang medalya ang mga military personnel nga nakaupod sa RoRe operation kag sa ginpatigayon man anay nga airdrop mission.
Suno kay Brawner, wala ginlauman sang tropa nga may dala nga mga patalom ang mga Chinese magluwas pa nga mas madamo sila ipaanggid sa mga Pinoy. Ginpangkuha man sang Chinese ang rifles nga dal-on kuntani sa tropa sang militar nga yara sa BRP Sierra Madre.
“The good thing is that we fought. The Chinese Coast Guard personnel had bladed weapons and our personnel fought with bare hands. That is what’s important. We were outnumbered and their weapons were unexpected but our personnel fought with everything that they had,” pahayag ni Brawner.
Pahayag pa sang AFP chief, ang mga pirata lamang ang sarang makahimo sang ginhimo sang China nga pagsakay sa vessel sang Pilipinas, ginguba pa ang sakayan kag mga equipment, kag nagpangawat pa.
“Only pirates do this. Only pirates board, steal, and destroy ships, equipment, and belongings,” dugang sang heneral.
Sa videos nga ginpost sang AFP, makita kun ano ka-agresibo ang China nga naghana sang ila dala nga mga patalom, may ginapahuni nga sirena, kag may makabululag pa nga strobe lights samtang ginasinggitan ang mga Pinoy sa tunga sang kadagatan.
Pito ka mga soldado ang nasamaran sa amo nga insidente kag natam-an gid ang isa ka Navy personnel nga si Seaman First Class Underwater Operator Jefferson Facundo nga nautdan gid sang tudlo.
Nahibaluan nga sa kada resupply missions sa Ayungin Shoal, wala ginatugutan ang military personnel nga magdala sang ila pusil agud nga malikawan nga magsaka ang tension sa amo nga teritoryo. Ini man ang rason kun nga civilian ships kag sa sini nga tion inflatable boats ang dala sang Philippine Navy kag indi ang mas daku nga mga barko.#
