Ginkumpirma ni United States Defense Secretary Lloyd J. Austin III nga may mga Amerikano nga soldado nga ginpadala sa iya gintawag nga “Task Force Ayungin.”
Natabo ang kumpirmasyon sang nagbisita ang opisyal sa Palawan sa Command and Control Fusion Center.
Pahayag sini, nagpakigkita siya sa American service members sa US Task Force Ayungin kag nagapasalamat gid siya sa ila nga kapisan para sa Amerika kag sa ila mga kaalyado kag mga partner sa rehiyon.
“I visited the Command and Control Fusion Centerin Palawan today. I also met with some American service members deployed to U.S. Task Force Ayungin, and I thanked them for their hard work on behalf of the American people and our alliances and partnerships in this region,” suno kay Austin.
Suno sa Armed Forces of the Philippines (AFP), ang tropa sang US sa Palawan ang nagahatag sang technical assistance paagi sa information-sharing group sa idalom sang Command and Control Fusion Center sa Western Command.
Amo ini suno sa AFP ang nagapasanyog pa sa kapasidad sang Pilipinas sa maritime domain awareness nga isa ka importante nga bagay sa pagplano sa pagpatuman sang mga programa kag aktibidad para protektahan ang mga interes sang pungsod sa West Philippine Sea.
Kilala ang Ayungin Shoal nga isa ka submerged reef sa Spratly Islands. Nahamtang ini 105 nautical miles sa nakatundan sang Palawan kag sulod sa 200-mile exclusive economic zone (EEZ) sang Pilipinas.
Didto man sa Ayungin Shoal nahamtang ang World War II-era ship nga BRP Sierra Madre halin pa sang 1999.
Ini nga barko nga simbolo sang soberanya sang Pilipinas sa teritoryo amo gid ang ginadumtan sang China rason nga ginabalagan ang mga misyon sang Manila pakadto sa Ayungin.
