ILOILO CITY – Ginareklamo sang mga stranded nga Overseas Filipino Worker sa Cebu ang wala sang kaathagan nga plano sang Overseas Workers Welfare Administration para sa ila.
Sa interview sang Bombo Radyo kay Ricky Sioson, isa sa mga OFW iya ginpahayag nga makapila na nga bes sya nga nakig-angot sa talatapan sang Overseas Workers Welfare Administration apang wala sa gihapon sang athag nga plano kag impormasyon kun san-o sila makapauli sa Iloilo.
Suno kay Sioson, sila na mismo ang nagmato-mato nga magpadulong sa Department of Health sa Cebu agud magpaidalom sa Polymerase Chain Test.
Dugang sang natungdan, masobra na sa duha ka bulan sila nga stranded sa Cebu kag halos maubos na ang ila budget bangud sila pa ang nagabayad sang ila akomodasyon sa hotel.
Santo sa pahayag ni Sioson, luyag nila nga mahatagan sang athag na nga plano sang ila pagpauli sa mas madali nga tion bangud luyag na nila makapauli sa ila mga pamilya.
