Ginalantaw sang pamunuan sang Iloilo Police Provincial Office (IPPO) nga isa ka grupo nga nakaagi na preso ang mga suspek nga ginapahayag nag- hold up sa empleyado sang isa ka cargo delivery sa Rizal Street, Brgy. Poblacion, Pototan, Iloilo sang Huwebes, Hulyo 29.
Matandaan nga sa natabo nga alleged hold-up incident, nataban sang ginapahayag tatlo ka suspek ang masobra P1.7 million nga koleksyon sang isa ka cargo delivery.
Sa interview sang Bombo Radyo kay Police Col. Gilbert Gorero, Director sang IPPO, iya ginpahayag nga base sa inisyal nga imbestigasyon, naggwa nga ginplanuhan sang maayo sang mga suspek ang ila mga tikang.
Suno kay Gorero, kaangay nga eksperyensyado ang mga suspek sa ila iligal nga aktibidad kag posible nga may yara ang mga ini sang insider sa cargo delivery company kun sa diin sila nakakuha sang pila ka mga impormasyon nga nagpahapos sang ila ulubrahon.
Dugang pa ni Gorero, ginmanduan na niya ang Pototan Municipal Police Station nga mas padasigon ang imbestigasyon agud matumod ang identity sang mga suspek sa labing madali nga panahon.
Una na nga nadakpan ang isa sa mga suspek apang wala ginhingidlan sang otoridad.
