ALIMODIAN, ILOILO – Nagapabilin nga at large ang anum ka mga armado nga persona nga nagluthang-patay sa isa ka mangunguma sa Brgy. Luan-luan, Alimodian, Iloilo.
Ang biktima amo si Macario Cabalfin Aloquin, 58 anyos, pamilyado sang nasambit nga lugar.
Sa interview sang Bombo Radyo kay Police Lt. Jolan Benson, Deputy Chief of Police sang Alimodian Municipal Police Station, iya ginpahayag nga lunsay ulo ang igo sang biktima nga si Aloquin apang natalana nga ipaidalom sa autopsy ang bangkay.
Suno kay Benson, nagapang-utod sang kawayan malapit sa ila balay ang biktima sang ginpalapitan kag hinali nga ginluthang sang anum ka mga persona nga lunsay naka-bonnet.
Ginpahayag ni Benson nga sang amo nga tion, ginpahayag nga naga-isahanon lamang ang biktima sa ila balay.
Gilayon nga nagpalagyo ang mga suspek matapos ang ginhimo nga krimen kun sa diin anum ka empty shells sang .45 caliber pistol ang nakuha sa crime scene.
Sa subong, indi pa matul-id sang otoridad ang motibo sa pagpatay sa biktima.
