ILOILO CITY – Ginpasidunggan sang Provincial Peace and Order Council (PPOC) sa pagpanguna ni Iloilo Gov. Arthur Defensor Sr. ang walo ka mga barangay tanod nga nagpakigbato sa mga katapo sang New People’s Army (NPA) nga tuyo kun tani magsulod sa Brgy. Lampaya, Leon, Iloilo.
Suno kay Provincial DILG Director Teodora Sumagaysay, kadungan sa ginpatigayon nga pagsapol sang PPOC, nangin highlight man ang pagkilala sa mga katapo sang Alsa Masa kag mga Barangay Tanod sang Brgy. Lampaya.
Una man nga gin-istoryahan ang paghatag sa mga ini sang cash incentives, apang mas ginpakamaayo sang Gobernador nga mangin long-term ang pagbulig sa mga ini paagi sa paghatag sang palangabuhi-an.
Ginkalipay naman sang barangay kagawad nga si Benito Cantomayor kag commander sang grupo nga Alsa-Masa, ang pagkilala nga ginhatag sa ila sang probinsya.
Ginapasalamatan man sini ang plano ni Gov. Defensor nga paghatag sa ila sang palangabuhi-an sa Brgy. Lampaya, bangud tuman man ka pigado ang ila nga sitwasyon.
Nahibaluan nga sa walo nga ginpasidunggan, wala nakatambong si Brgy. Tanod Romeo Cabalong bangud nagapabilin pa ini sa hospital matapos nga na-igo sang bala.