ILOILO CITY – Ginpang-utod na naman ang mga tanom sa pila ka mga bahin sa syudad sang Iloilo.
Sa interview sang Bombo Radyo kay Jocelyn Maluto, myembro sang Beautification program sang syudad, iya ginpahayag nga ang Tabebuia Tree ukon Trumpet Tree ang gin-utod sang wala makilal-an nga tawo.
Suno kay Maluto, masobra sa apat ka mga Tabebuia Tree ang ginpang-utod sa Dungon A, Jaro, Iloilo City.
Nagpa-blotter naman ang mga katapo sang beautification program agud nga madakpan ang responsable sa pagpang-utod kag pagpanggabot sang mga tanom apisar nga una na nga nadakpan si Winston Duardo Paja, 38, sang Brgy. Mansaya, Lapuz, Iloilo City kag ginapahayag nga may yara sang deperensya sa panghuna-huna nga amo ang nadakpan sa Closed Circuit Television (CCTV) camera sang Danao, Iloilo City Proper nga naggabot sang tanom sa General Luna St.
Dugang pa sang natungdan, nakibot na lamang sila nga sa ila pag-abot sa lugar, nagkala-utod na ang puno nga ila gintamon.
Nagalain man ang buot sang mga myembro sang beautification program bangud nagakaayawan na sila sang pagpangtanom apang mahapos lang sa iban nga tawo ang manghalit.
