ILOILO CITY – Ginkadismaya ni City Budget Officer kag Beautification Program Head Ninda Atinado ang hungod nga pagpanggabot sang mga tanum sa Iloilo Esplanade.
Sa interview sang Bombo Radyo kay Atinado, iya ginpahayag nga ang mga tanum nga ginpanggabot ang yara nahamtang sa Esplanade 1 sa distrito sang Molo kag Esplanade 2 sa distrito sang Mandurriao.
Suno kay Atinado, ginmandu na ni Iloilo City Mayor Jerry Treñas sa Molo kag Mandurriao PNP nga pahamtangan sang police deployment kag Closed Circuit Television (CCTV) sa Esplanade agud nga mahibalu-an kun sin-o ang nagapanghalit.
Nagpamalibad si Atinado nga maghatag sang recorded interview apang suno sa iya, ang iya tingog ang ibase na lang sa iya performance bilang pinuno sang Beautification Program.
Samtang, suno naman kay Iloilo City Mayor Jerry Treñas, ginakasubo niya nga may mga tawo nga tubtub subong, ang pagpanghalit lang ang ginahimo.
Sa pagkamatuod suno kay Treñas, ang pagpanami sang palibot sang syudad ang isa sa iya ginatutukan bangud nga madamu nga mga dumuluong ang nagabisita.
Nagalaum naman ang alkalde nga madakpan ang mga nagpanggabot sang tanum sa Iloilo Esplanade.
