Nakahibalo ka bala nga ang tawo nga brokenhearted ang may tyansa nga makaangkon sang sakit sa tagipusuon?
Ginpaathag sang cardiologist nga si Jeffrey de Jesus nga may mga tawo nga brokenhearted ang nagaka-atake man sa tagipusuon apang ini ang tumalagsahon lang.
Ang kondisyon nga ini ang ginatawag nga “broken heart syndrome” ukon takotsubo cardiomyopathy.
Suno kay de Jesus, kun na stress ang isa ka tawo, nagadamo ang produksyon sang adrenaline sa iya nga lawas nga nagaapekto sa tagipusuon.
Ang adrenaline ang isa ka hormone nga ginapaguwa bilang tugon sa stress.
Kadam-an sa mga nagakabatyag sang broken heart syndrome amo ang mga babaye nga yara na sa edad 50 anyos pataas.
Ang kinalain sang broken heart syndrome sa ordinaryo nga heart attack amo nga wala ini nagatuga sang mga pagbara sa mga artery.
Dugang pa sang eksperto, tumalagsahon man ang nagakapatay bangud sa broken heart syndrome.
