ILOILO – Naghingyo ang talatapan sang Iloilo Fish Port Complex sa Iloilo City Government nga i-deputize ang ila safety ang health officers agud makaisyu man sang citation tickets sa mga nagalapas sa health protocols.
Sa interview sang Bombo Radyo kay Dr. Justo Anaquita, tagpamaba sang Iloilo Fish Port Complex, iya ginpahayag nga pinakauna nga nagakalapas sa sulod sang fish port complex amo ang physical distancing.
Ini bangud nagadali-dali ang mga tawo sa paglantaw kag pagpili kun may mag-abot nga suplay sang isda rason nga indi na matalupangdan nga nagaginutok sila.
Suno kay Anaquita, magluwas sa physical distancing, compliant naman ang kalabanan sa iban nga protocol kaangay sa pagsuksok sang face mask kag pagsuksok sang botas.
Nagalaum ang natungdan nga makahatag na sang sabat ang COVID-19 team sa ila hingyo agud madisiplina na ang mga tawo sa fish market.
Nahibaluan nga isa ang Iloilo Fish Port Complex sa una na nga ginkabig nga hotspot areas sa syudad bangud sang COVID-19 transmission.#
