ILOILO CITY – Kutub na lang sa Disyembre 31, 2019 ang ginhatag nga plaso sang Sanguniang Panglungsod sa mga telecommunications company agud nga mahitso ang nagalukot nga wirings nga amo ang masami nga ginatunaan sang sunog sa syudad sang Iloilo.
Sa interview sang Bombo Radyo kay Iloilo City Councilor Rommel Duron, chairman sang Committee on Public Utilities, iya ginpahayag nga may yara na sila sang draft proposal apang naghingyo ang mga kompaniya nga palawigon ang deadline sa pagpasa sang proposal.
Suno kay Duron, kalabanan sa mga nagalukot nga kuryente ang ginapanag-iyahan sang telecommunications company samtang ang iya naman sang Panay Electric Company ang amat-amat na nga nahitso.
Sa bahin naman sang natabo nga blackout sang damlag lang, ginpahayag ni Duron nga napalab-ot na ni Iloilo City Mayor Jerry Treñas sa Energy Regulatory Commission and tuhoy diri.
