ILOILO CITY – Nagapadayon ang Traffic Management Study sang Metropolitan Manila Development Authority sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, nag-umpisa na subong nga adlaw ang observation sang mga tiglawas sang Metropolitan Manila Development Authority tuhoy sa traffic management sa syudad sang Iloilo kag magalawig ini sang 10 adlaw.
Suno kay Treñas, hibaluon sang Metropolitan Manila Development Authority kun ano pa ang posible nga bag-uhon sa traffic management sa syudad sang Iloilo kasubong sa mga lugar sa Metro Manila.
Ginpahayag sang alkalde nga ipaidalom sa paghanas ang mga traffic auxiliary, traffic aides kag iban pa nga personnel para sa pagatukuron nga command center.
Magluwas diri, pagadugangan man ang traffic aides nga magabantay sa dalagan sang trapiko sa mga dalanon.
May kaangtanan sa pagpasangkad sang traffic management, ginpahayag sang alkalde nga gin-umpisahan na ang pagbutang sang mga bag-o nga Closed Circuit Television Cameras agud nga madali nga makita ang mga aksidente kag amo man ang mga traffic violators.
