ILOILO CITY- Gintawag ni anay Department of Health Secretary kag subong Iloilo 1st District Representative Janet Garin nga pinakamataas nga sahi sang hipokrisiya ang pahayag ni Public Attorney’s Office Chief Percida Acosta nga pagpatukod sang dengvaxia court.
Ini matapos ginpahayag ni Acosta nga naluoy siya kay Garin gani ginhingyo niya kay Court Administrator Midas Marquez nga maghimo sang dengvaxia court agud matipon diri ang tanan nga kaso angot sa dengvaxia kag agud indi na mabudlayan si Garin sa tion nga ginapatawag sa nagkalain-lain nga korte.
Sa interview sang Bombo Radyo kay Garin, iya ginpahayag nga luyag lang tabunan ni Acosta ang mga iligalidad nga iya ginpangkumiter bilang chief sang Public Attorney’s Office.
Suno kay Garin, tinutuyo ni Acosta nga i-lisa ang atensyon sang publiko agud indi matutukan ang technical malversation nga kaso batok sa iya kag nakitaan man sang Office of the Ombudsman sang probable cause sa kaso nga graft and corruption bangud sa paggasto sang pondo sang ahensya sa mga hilikuton nga indi na sakop sang Public Attorney’s Office kaangay sang pagpa-autopsy sang mga ginapatihan napatay bangud sa dengvaxia.
Magluwas diri, ginpahayag sang mamalidha nga isa man sa mayor nga luyag matabo ni Acosta ang paglegalize sang forensic laboratory nga gintukod nila sang iya abyan nga si Dr. Erwin Erfe, ang forensics chief sang opisina.
Dugang pa ni Garin, kwarta ang kabangdanan kun ngaa ginahimo ini tanan ni Acosta agud ma-justify ang tanan nga korapsyon nga iya nahimo sa iya talatapan.
Ginakabig ni Garin nga harassment kag pamulitika ang ginahimo ni Acosta.
