ILOILO CITY- Ginakabig nalang nga kalingawan kag wala ginaseryoso sang mga pumuluyo sang Estados Unidos ang mga ginahimo sang mga tagsakdag ni outgoing US President Donald Trump agud punggan ang matawhay nga inagurasyon ni President-elect Joe Biden bilang ika-46 nga presidente sang pungsod .
Sa interview sang Bombo Radyo kay Dr. John Tacapan, Bombo Intl Correspondent direkta sa California, iya ginpahayag nga apisar ginaistoryahan sa media ang plano sang mga Republican senators nga magboto agud i-reject ang kadalag-an ni Biden, wala na ini ginasapak pa sang mga tawo.
Suno kay Tacapan, nahibaluan sang mga pumuluyo sang America nga wala man sang pakadtuan ang ginahimo sang kampo ni Trump kag madayon sa gihapon ang pagpungko ni Biden bilang pinakamataas nga lider sang US.
Matandaan nga ginpangunahan ni Republican Senator Ted Cruz sang Texas ang grupo nga nagapanawagan sang delay sang full certification sang kadalag-an ni Biden kag ang 10 ka adlaw nga imbestigasyon tuhoy sa akusasyon sang dinayaay.
Ini nga mga akusasyon ang ginaduso man ni Trump apang makapila ka beses naman nga gin- dismiss sa korte lakip na ang mga huwes nga si Trump mismo ang nag-appoint.
