Ginlakip sa ginaimbestigaran nga mga indibidwal sa natabo nga pagkasunog sang mga malahalon nga mga salakyan ni suspended Tobias Fornier, Antique Mayor Ernesto “Toto” Tajanlangit III amo mismo ang iya mga tinawo.
Sa interview sang Bombo Radyo kay SFO4 Harry Artiaga, Municipal Fire Marshal sang Tobias Fornier, Antique, iya ginpahayag nga kabahin ini sang ila paglantaw sa tanan nga posible anggulo sa natabo nga pagkasunog sa mga luxury cars ni Tajanlangit.
Nahibaluan nga isa sa mga ginasundan nga anggulo amo nga ginhungod ang pagsunog sa mga salakyan nga naka-park sa garahe sang balay sang pamilya sang alkalde.
Wala man sang CCTV ang lugar kun sa diin naka-park ang mga salakyan.
Ang insidente natabo pila ka adlaw lang matapos gindagdagan sang suspension order si Tajanlangit sa sulod sang anom ka bulan angot sa kaso nga gin-file ni Vice Mayor Jose Maria Fornier.
Gin-akusahan ni Fornier si Tajanlangit sang abuse of authority, conduct unbecoming of a public official, grave misconduct, kag paglapas sa RA 6713 ukon ang “Code of Conduct and Ethical Standards for Public Officials and Employees.”
Nag-ugat ang kaso sa insidente sang Abril sang gintapungol ni Tajanlangit si Fornier bangud sa isyu sa tagtaganay sang food packs sa mga pumuluyo nga apektado sang El Nino victims.
