ILOILO CITY – Tubtob na lamang sa Hunyo 30, 2023 ang pagbyahe sang mga traditional jeepneys.
Ini bangud nga maga-expire na ang prangkisa sang mga traditional jeepneys sa amo nga petsa matapos nga ginpalawig sang Land Transportation Franchising and Regulatory Board ang deadline para sa mga operators nga magporma sang kooperatiba.
Ang mga kooperatiba ang makabulig sa mga operators agud nga masarangan ang pagbakal sang modern jeepneys nga nagabalor sang ginabanta P2.6 million ang kada isa pinaagi sa pag-utang sa mga financial institutions.
Suno kay Land Transportation Franchising and Regulatory Board Technical Division head Joel Bolano, ang Certificate of Public Conveyance ang ibalik sa gobyerno kag i-award sa mga na-consolidate.
Ang mga traditional jeeps sang operators nga yara na sa proseso sa pagsaylo sa kooperatiba ukon korporasyon ang indi madala sa June 30 nga deadline.
May yara sila sang tubtob sa Disyembre agud nga tapuson ang consolidation process.
Una na nga ginpahayag sang gobyerno nga ang mga apektado nga drivers kag operators ang hatagan sang cash assistance kag training nagikan sa Department of Labor kag sa Technical Education and Skills Development Authority.
