ILOILO CITY – Posible nga mag-file man sang petition ang pila ka mga kooperatiba sa Western Visayas nga pasakaan ang pamasahe sa tion nga magapadayon ang pagsaka sang presyo sang gatong.
Subong nga semana, nagsaka naman ang presyo sang produktong petrolyo kun sa diin, ikalima na ini nga sunud-sunod nga semana nga may price hike sa gasolina kag ika-anum sa diesel kag kerosene.
Sa Luzon, nag-file na sang petition ang pila ka mga transport groups sa Land Transportation Franchising and Regulatory Board nga pasakaan sang P2 ang pamasahe sa tanan nga modes of public transportation.
Sa interview sang Bombo Radyo kay Mr. Reymundo “Boyet” Parcon, presidente sang Iloilo City Loop Alliance of Jeepney Operators and Drivers Association kag chairman sang Western Visayas Transport Cooperative, iya ginpahayag nga sa tion nga magsaka sa P75- P80 ang balor sang kada litro sang diesel, mapilitan sila nga mag-file sang petition.
Suno kay Parcon, indi pa sila makapasaka sang pamasahe subong bangud nga makaluluoy man ang mga commuters.
Pahayag niya dugang, nagikan sa P65, 000 kada adlaw nga gasto sang kooperatiba sa diesel sa 57 ka mga units, nagapa-in na sila subong sang tubtob P95, 000.
