ILOILO CITY – Apektado ang mga tricycle drivers nga nagabyahe sa syudad sang Iloilo sa pagdumili sang Department of the Interior and Local Government sa mga tricycle nga magbyahe sa national highway.
Sa interview sang Bombo Radyo kay Ronald Rodrigo, isa ka tricycle driver nga nagabyahe sa Iloilo Terminal Market, iya ginpahayag nga 15 ka tuig na siya nga nagabyahe sang tricycle kag ini na ang iya nangin palangabuhian.
Suno kay Rodrigo, mas maayo ang benta niya sang una ipaanggid subong nga daw kaangay nga gina-ipit na ang mga tricycle sa diin madamo na sang mga dalan nga indi mahimo maagyan.
Pahayag niya, kun sadto makalabay pa ang tricycle sa De Leon Street, sa subong ini ang ginadumilian na kag sa Rizal Street gid lamang ang ginapahanugutan sa diin na buhinan ang ila pasahero.
Masami sa mga pasahero sang tricycle drivers amo ang mga padulong sa Ortiz, Parola Wharf kag Iloilo Terminal Market.
Gani nagahingyo si Rodrigo kay Iloilo City Mayor Treñas nga mahatagan sang igtalupangod ang problema nila ilabi na sa pagtumod sang mga dalan nga mahimo malabayan sang tricycle.
Dugang pa sang natungdan, kun maayo ang byahe sang tricycle, makatipon man siya sang P400 apang sa subong nga mahina ang byahe, kulang pa sunokay Rodrigo ang inugbakal niya sang gatong sa tricycle ang iya mabenta sa isa ka adlaw.
Samtang suno naman kay Luvizmin Residio, iya na lang sundon ang mandu sang Department of the Interior and Local Government sa pag-ban sang mga tricycle sa national road.
Pahayag niya, isa pa lang siya ka bulan nga nagabyahe sang tricycle sa diin una niya nga palangabuhian amo ang pagbyahe sang trisikad.
Masubo lang dugang pa ni Residio bangud naga umpisa pa lang siya sa pagbyahe sang tricycle kag subong ini pa ang dumilian.
